ប្រទេសឥណ្ឌូនេស៊ី៖ រដ្ឋមន្រ្តីក្រសួងពាណិជ្ជកម្មលោក ប៉ាន សូរស័ក្តិ បានជួបពិភាក្សាការងារជាមួយរដ្ឋមន្ត្រីក្រសួងវិនិយោគ និងទំនាក់ទំនងសេដ្ឋកិច្ចបរទេសមីយ៉ាន់ម៉ាលោក Aung Naing Oo នៅថ្ងៃពុធ ទី១៨ ខែឧសភា នៅទីក្រុងបាលី ប្រទេសឥណ្ឌូនេស៊ី។

លោករដ្ឋមន្រ្តី ប៉ាន សូរស័ក្កិ បានស្វាគមន៍និងថ្លែងអំណរគុណចំពោះលោករដ្ឋមន្ត្រី AUNG NAING Oo ដែលបានគាំទ្រកម្ពុជាក្នុងនាមជាប្រធានដឹកនាំកិច្ចប្រជុំថ្នាក់រដ្ឋមន្ត្រីសេដ្ឋកិច្ចអាស៊ានក្នុងឆ្នាំ២០២២។

រដ្ឋមន្ត្រីកម្ពុជា-មីយ៉ាន់ម៉ា បានផ្លាស់ប្តូរយោបល់លើវឌ្ឍនភាពសេដ្ឋកិច្ច-ពាណិជ្ជកម្មទាំងក្នុងក្របខណ្ឌតំបន់ និងទ្វេភាគី សំដៅលើកម្ពស់ទំហំពាណិជ្ជកម្ម និងជំរុញការស្តារសេដ្ឋកិច្ចឡើងវិញ។

លោក Aung Naing Oo បានកោតសរសើរកម្ពុជាពីភាពជោគជ័យក្នុងការចរចាបង្កើតកិច្ចព្រមព្រៀងពាណិជ្ជកម្មសេរីទ្វេភាគីរវាងកម្ពុជា-ចិន និងកម្ពុជា-កូរ៉េ នាពេលថ្មីៗនេះ។ លោករដ្ឋមន្ត្រី Aung Naing Oo មានបំណងពន្លឿនការបញ្ចប់ការពិភាក្សាលើសេចក្ដីព្រាងកិច្ចព្រមព្រៀងស្តីពីវិនិយោគរវាងកម្ពុជា-មីយ៉ាន់ម៉ា និងការចរចារកិច្ចព្រមព្រៀងស្តីពីការជៀសវាងការយកពន្ធត្រួតគ្នា (The Double Taxation Avoidance Agreement)។

រដ្ឋមន្រ្តីទាំងពីរ បានបញ្ជាក់ជាថ្មីអំពីការប្តេជ្ញាចិត្តក្នុងការពង្រឹង និងពង្រីកកិច្ចសហប្រតិបត្តិការសេដ្ឋកិច្ច-ពាណិជ្ជកម្ម និងវិនិយោគ ទាំងក្នុងក្របខណ្ឌទ្វេភាគី ក៏ដូចជាក្របខណ្ឌតំបន់អាស៊ាន៕